ەلىمىزدەگى دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىندا دەنساۋلىق ساقتاۋ جۇيەسىنىڭ تۇراقتىلىعى - دەنساۋلىق ساقتاۋعا باعىتتالاتىن قاراجاتتى ءادىل ءبولۋدى جانە ۇتىمدى پايدالانۋدى كوزدەيتىن ءتيىمدى قارجىلاندىرۋ جۇيەسىمەن بايلانىستى ەكەندىگى ايتىلعان ەدى. ءمامس جۇيەسى دەنساۋلىق ساقتاۋعا جۇمسالاتىن ءوسىمتال مەملەكەتتىك جانە جەكە شىعىنداردىڭ سالدارىنان بولاتىن قارجىلىق قاتەرلەردى جويۋ ماقساتىندا قولدانىلماق.  بۇگىنگى تاڭدا وبلىس تۇرعىندارىنا ءمامس جۇيەسىن ءتۇسىندىرۋ جۇمىستارى بەلسەندى جۇرگىزىلۋدە. ايتا كەتسەك، 153 نىساندا بەينەروليكتەر ترانسلياسياسى جۇزەگە اسىرىلىپ، قوعامدىق ورىنداردا سىرتقى جارنامالار مەن اۋديوجارنامالار تۇرىندەگى اقپاراتتار ورنالاستىرىلدى. اتالمىش جۇيەنى تۇسىندىرگەن 418 280 بۋكلەت، 200 000 جول ءجۇرۋ بيلەتتەرى مەن كوممۋنالدىق كاسىپورىنداردىڭ 1 000 تۇبىرتەگى تاراتىلدى. تۇرعىنداردىڭ نىسانالى اۋديتورياسىمەن ياعني، جۇمىس بەرۋشىلەرمەن، قىزمەتكەرلەرمەن، مەملەكەتتىك قىزمەتشىلەرمەن، جەكە سوت ورىنداۋشىلارى القاسىنىڭ جانە ادۆوكاتتار القاسىنىڭ، شارۋا قوجالىقتارىنىڭ، جەكە كاسىپكەرلەردىڭ قىزمەتكەرلەرىمەن كەزدەسۋلەر ۇيىمداستىرىلدى. باسقوسۋلار بارىسىندا ءمامس جۇيەسىنىڭ تيىمدىلىگى مەن جۇمىس ىستەيتىن حالىقتىڭ، جۇمىس بەرۋشىلەر مەن ءوزىن-وزى جۇمىسپەن قامتىعان حالىقتىڭ مىندەتتى ساقتاندىرۋ تولەمدەرىنىڭ نەگىزىندە قۇرىلاتىندىعى ايتىلدى. سونىمەن بىرگە حالىقتىڭ الەۋمەتتىك قورعالماعان توپتارى (بالالار، زەينەتكەرلەر، ەڭبەك ەتۋگە قابىلەتسىز ازاماتتار مەن جۇمىسسىزدار) ءۇشىن ساقتاندىرۋ جارنالارىن رەسپۋبليكالىق بيۋدجەت قاراجاتىنان مەملەكەت تولەيتىندىگى جەتكىزىلدى. بۇل جۇيەنىڭ ماڭىزدىلىعى تۋرالى وبلىستىق دەپارتامەنت جانە اۋداندىق  مەكەمە ماماندارى ارنايى وقىتىلدى.  «نۇر وتان» حدپ وبلىستىق فيليالى مەن حالىققا قىزمەت كورسەتۋ ورتالىعىنىڭ فيليالدارىندا تۇرعىندارعا كەڭەس بەرۋلەر ۇيىمداستىرىلۋدا.  سونداي-اق وڭىردە مىندەتتى الەۋمەتتىك مەديسينالىق ساقتاندىرۋدى ەنگىزۋ ماسەلەلەرى بويىنشا ءبىرىڭعاي Call ورتالىعى جۇمىس جاساپ تۇر. وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن كەلىپ تۇسكەن مالىمەت بويىنشا، وڭىردە 2500-گە جۋىق كەزدەسۋلەر ۇيىمداستىرىلىپ، وعان 357 972 تۇرعىن قاتىسقان. الداعى ۋاقىتتا وسى باعىتتاعى جۇمىستار جۇيەلى  جالعاسىن  بولادى.  

    گۇلىم اقاپ،

باتىس قازاقستان وبلىسى